Ҳасан Муҳаммад Ал-Маҳдӣ: Тоҷикистон кишвари худодод аст

Душанбе, 07.09.2015. (АМИТ «Ховар»). — Меҳмонони Арабистони Саудӣ дар ҷамомади мизи мудаввари Фондҳои арабӣ ва Бонки исломии Рушд, ки  дирўз дар шаҳри Душанбе баргузор гардид, бо изҳори қаноъатмандӣ аз фазой озоди сармоягузорӣ дар Тоҷикистон омодагии худро барой рушди ҳамкориҳо дар ин самт иброз намуданд. 
Ҳасан Муҳаммад Ал-Маҳдӣ , мудири кулли раёсати амалиёти Фонди Рушди Арабистони Саудӣ дар баёни андешаҳояш перомуни масъалаи сармоягузорӣ ба лоиҳаҳои сармоягузории Тоҷикистон ва рушди бемайлони ин кишвар зимни суҳбат бо АМИТ «Ховар» гуфт: Ҳадаф аз иштироки банда дар ин мизи мудаввар ба даст овардани маълумоти  бештар аз фазои сармоягузорӣ дар Тоҷикистон мебошад. 
«Мо қаблан иттилоъ ёфта будем, ки  Тоҷикистон як кишвари худодод аст ва инҷо захираҳои табиӣ хеле фаровон вуҷуд доранд, ки таваҷуҳи моро бештар ба худ ҷалб мекунанд. То ҳол мо чандин лоиҳаҳои сармогузориро дар Тоҷикистон амалӣ намудаем ва ин кор дар оянда низ идома хоҳад ёфт.Илова бар ин мо умед дорем, Ҳукумати Ҷумҳурии Тоҷикистон дар густариши ҳамкориҳо дар соҳаи сайёҳӣ  ба мо мусоидат кунад. Истиқбол ва меҳмоннавозии мардуми тоҷик моро хеле ба шигифт овард ва албатта ин амал тибқи маълумоти қаблан ба даст расидаи мо яке аз хусусиятҳои миллии бародарони тоҷик маҳсуб меёбад. Маҳз ҳамин амал яке аз омилҳои асосии ҷалби сайёҳон ба соҳаи сайёҳӣ бошад. Мо аз сармоягзуорӣ дар кишвари Тоҷикистон умеди зиёд дорем ва ин нақшаро ҳатман амалӣ хоҳем кард,- гуфт Ҳасан Муҳаммад Ал-Маҳдӣ.