Баррасии меъёрҳои байналмилалӣ оид ба ҳифзи иҷтимоӣ

Душанбе, 17.09.2015 (АМИТ «Ховар»).- «Меъёрҳои  байналмилалӣ дар соҳаи ҳифзи иҷтимоӣ, ҳифзи модарон ва кумакҳои пулию тиббӣ ба онҳо»- таҳти чунин унвон рӯзҳои 16-17 сентябри соли равон дар бинои «Душанбе Плаза» семинари омӯзишӣ баргузор гардид, ки он имрӯз кори худро ҷамъбаст кард.  
Бино ба иттилои Вазорати тандурустӣ ва ҳифзи иҷтимоии Ҷумҳурии Тоҷикистон семинари мазкур якҷоя бо Ташкилоти байналмилалии меҳнат  бахшида ба соли оила гузаронида шуда, дар кори он  намояндагони вазорату идораҳои алоқаманд, Иттифоқи касаба, Иттиҳодияҳои корфармоён ва намояндагони ташкилоти мазкур иштирок доштанд.
  Зимни баррасии мавзӯи мазкур зикр шуд, ки Ҷумҳурии Тоҷикистон дар айни замон ҳамчун аъзои комилҳуқуқи Ташкилоти байналмилалии меҳнат қариб 50 конвенсия ва тавсияномаи ин созмони бонуфузи ҷаҳониро эътироф ва қабул намудааст. Аз ин рӯ муқаррароти санадҳои меъёрию ҳуқуқии соҳаи марбут ба ҳуқуқи меҳнатию иҷтимоии занону кӯдакон ва меъёрҳои ҳуқуқии байналмилалӣ мутобиқ мебошанд.
Дар ҷаласаи мазкур ҳамчунин самтҳои минбаъдаи рушди низоми таъминоти иҷтимоӣ ва сиёсати суғуртавии коргарон мавриди баррасӣ қарор дода шуданд.