Бозгашти паҳлавонони наврас бо 9 медал аз Қирғизистон

Душанбе, 18.09.2015 (АМИТ «Ховар», Фарзонаи Давлат).-Варзишгарони тоҷик дар мусобиқаи дзюдо байни наврасон барои дарёфти Ҷоми Дордой, ки дар шаҳри Бишкеки Қирғизистон баргузор шуд, 9 медал ба даст оварданд.
Бино ба иттилои Федератсияи дзюдои Тоҷикистон, паҳлавонони кишвар се медали тилло, ду нуқра ва чаҳор биринҷӣ ба даст оварданд. 
Гуфта мешавад, дар ин мусобиқаи минтақавӣ, ки бори сеюм аст доир мешавад, 161 варзишгар аз Қазоқистон, Қирғизистон, Тоҷикистон ва Ӯзбекистон тӯли се рӯз барои 14 номгӯй медалҳо мубориза бурданд.
Дар  мусобиқа ба ҳисоби умумидаставӣ дастаи Ӯзбекистон бо касби 12 медал: 6 тилло, 2 нуқра ва 4 биринҷӣ ғолиб омад. Тими мунтахаби Қирғизистон бо касби 30 медал: 5 тилло, 9 нуқра ва 16 биринҷӣ мақоми дуюм ва дастаи Тоҷикистон бо гирифтани  9 медал: 3 тилло, 2 нуқра ва 4 биринҷӣ ҷой сеюмро ишғол кард. Паҳлавонони Қазоқистон бо касби 9 медал: 2 тилло, 3 нуқра ва 4 биринҷӣ дар зинаи охирин  ҷойгир шуданд.