Дар вилояти Бадахшон теъдоди нашъамандон ба 874 нафар расидааст

Душанбе, 25.09.2015. (АМИТ «Ховар», Лайло Тоирӣ). -Вазъи  нашъамандӣ дар вилояти Бадахшон  ташвишовар буда, теъдоди нашъамандон ба 874 нафар расидааст. Дар шаҳри Хоруғ 325 нашъаманд ба қайд гирифта шудааст, ки аз он 3 нафараш зан аст. Ин нуктаро  кормандони Агентии назорати маводи нашъаовар зимни  вохӯрӣ бо толибилмони синфҳои болоӣ дар  мактаби таҳсилоти умумии №7-и маҳаллаи Тирчиди шаҳри Хоруғ  таъкид намуданд. Вохӯрӣ бо мақсади дар амал татбиқ намудани нақшаи чорабиниҳои «Стратегияи миллии мубориза бар зидди маводи нашъаовар дар Ҷумҳурии Тоҷикистон барои солҳои 2013-2020» ва баҳри пешгирии нашъамандӣ аз тарафи кормандони Раёсати Агентии назорати маводи нашъаовар дар ВМКБ дар ҳамкорӣ бо Раёсати маорифи вилоят 23 сентябри соли ҷорӣ баргузор гардид. 
Кормандони агентӣ инчунин вазъи нашъамандиро  дар Тоҷикистон ва хусусан дар вилояти Бадахшон  таҳлил намуда, ба толибилмон дар бораи таърихи пайдоиши маводи нашъаовар ва оқибати фоҷиаовари истеъмоли он нақл намуданд.