Хусусияти асосии Конститутсияи Тоҷикистон миллӣ будани он аст

Душанбе, 17.9.2015. (АМИТ «Ховар»). — «Конститутсияи давлати соҳибистиқлоли Тоҷикистон, ки дар таҷрибаи конститутсионализми кишвар бори нахуст тавассути раъй¬пурсии умумихалқӣ қабул гардид, ифодаи азму иродаи халқи Тоҷикистон буда, хусусияти асосии ин санад миллӣ будани он ба шумор меравад», — ин нуктаро Президенти Ҷумҳурии Тоҷикистон Эмомалӣ Раҳмон дар Конфронси байналмилалӣ  бахшида ба 20-солагии таъсиси Суди  конститутсионии Ҷумҳурии Тоҷикистон  дар мавзӯи «Адолати суди конститутсионӣ  кафолати таъмини волоияти Конститутсия», ки имрӯз дар пойтахти Тоҷикистон ҷараён дорад, изҳор дошт.
Сарвари давлат Эмомалӣ Раҳмон афзуд, ки ислоҳоти конститутсионӣ ва дар ин замина бо роҳи раъйпурсии умумихалқӣ қабул гардидани Конс¬титутсияи давлати соҳибистиқлоли Тоҷикистон аз ҷумлаи вази¬фа¬ҳои таърихии марҳалаи аввали соҳибихтиёрии давлат ва ҷомеаи Тоҷикистон ба шумор мерафт, ки ин иқдоми бузург 6-уми ноябри соли 1994 амалӣ карда шуд.
«Дар Конститутсия худро қисми ҷудонашавандаи ҷомеаи ҷаҳонӣ эълон кардани мардуми Тоҷикистон низ аз куҳанбунёд ва фарҳангӣ будани ин халқ маншаъ гирифта, дар баробари ҳифз ва ғанӣ гардонидани арзиш¬ҳои миллӣ, инчунин садоқати давлат ва миллати тоҷикро ба арзиш¬ҳои умумиэътирофшудаи башарӣ инъикос менамояд», — тазаккур дод Эмомалӣ Раҳмон.