Ифтитоҳи муассисаи нави таҳсилоти миёнаи умумӣ дар ноҳияи Рўдакӣ бо иштироки муовини Сарвазир

Душанбе, 01.09.2015. (АМИТ «Ховар»). — Имрўз муовини Сарвазири мамлакат Марҳабо Ҷабборӣ дар маросими мавриди истифода қарор додани муассисаи нави таҳсилоти миёнаи умумӣ дар деҳаи Теппаи Самарқандии ноҳияи Рўдакӣ иштирок кард.
Бунёди  муассисаи  таҳсилоти  миёнаи умумии №179 дар ин деҳаи ноҳияи Рўдакӣ  соли  2012  дар  доираи  таъмини  иҷрои  дастуру  супоришҳои  Президенти  Ҷумҳурии  Тоҷикистон,  вобаста  ба рушди  бемайлони  соҳаи   маориф  дар  мамлакат   шурӯъ   гардида,   барои  640   нафар  хонанда  пешбинӣ  шудааст. Мактаби  нав аз чор бино ва 26 синфхонаи таълимӣ  иборат буда бо лавозимот ва таҷҳизоти муосири таълимӣ таъмин мебошад.
Дар    рўзи  аввали  мавриди  истифода қарор гирифтани бинои нави мактаб  муовини Сарвазири мамлакат дар якҷоягӣ бо ҳайати омўзгорон ва хонандагон дар  тамошои дарси сулҳ, ки аз Ҷониби Президенти Ҷумҳурии Тоҷикистон Эмомалӣ Раҳмон дар саҳни Донишгоҳи  Давлатии  Кўлоб  ба  номи  Абўабдуллоҳ  Рўдакӣ гузаронида шуда, тавассути шабакаҳои телевизионии мамлакат мустақиман  пешкаш гардид,  иштирок кард.