Р.Раҳимзода кормандони милитсияро дар беморхона аёдат кард

Душанбе, 25.09.2015. (АМИТ «Ховар», Лайло Тоирӣ). -24 сентябр дар рӯзи  Иди саиди Қурбон, вазири корҳои дохилӣ Раҳимзода Рамазон Ҳамро ба Маркази миллии тиббии «Қарияи Боло» дар шаҳри Душанбе омада, аз саломатии кормандони Дастаи таъйиноти махсуси ВКД ва ШВКД дар шаҳри Ваҳдат, ки зимни ҳуҷуми мусаллаҳона ва амалиёти махсус бар зидди гурӯҳи террористии А.Назарзода маҷрӯҳ гардидаанд, хабар гирифт.
Вазири корҳои дохилӣ кормандонро бо Иди Қурбон табрик гуфта, ба онҳо шифои комил хост. Ҳамзамон зимни аёдат аз номи Ҳукумати кишвар ва Вазорати корҳои дохилӣ ба маҷрӯҳон туҳфаҳои идона ва маблағҳои пулӣ тақдим шуданд.
Зикр гардид, ки кормандони мақомоти корҳои дохилӣ  таҳти дастгирию ғамхории  пайвастаи Президенти кишвар муҳтарам Эмомалӣ Раҳмон қарор дошта, ба онҳо кумаки ҳамаҷониба расонида мешавад.