Рашт: Ба таълиму тарбия фаро гирифтани кӯдакони имконияташон маҳдуд

Душанбе, 23.09.2015 (АМИТ «Ховар», Субҳониддини Маҳмуд).-Маркази будубоши рӯзонаи «Аниса»  барои кӯдакони имконияташон маҳдуд (маъюбони гурӯҳи 2, 3) дар назди ташкилоти ҷамъиятии «Заршедабону»-и Мақомоти иҷроияи  ҳокимияти давлатии ноҳияи Рашт аз ҳисоби Агентии ҳифзи иҷтимоӣ дар назди Вазорати тандурустӣ  маблағгузорӣ мегардад.
Дар  айни замон дар марказ 20 кӯдаки  имконияташ маҳдуд ба тавонбахшӣ фаро гирифта шудааст. Дар муассиса бо дастгирии роҳбари он    Нуриддин  Ғиёсов  19 ҷойи корӣ ташкил шудааст, ки мутахассисони он аз муаллимҳо, духтури кӯдакона, духтури асаб иборат аст.
Маркази мазкур кӯдакони маъюби гурӯҳи 2 ва 3 -ро  табобат ва таълиму тарбия намуда, ба мактабҳои миёна равон мекунад. Муассисаи мазкур дар дохили худ гурӯҳҳои сайёр дорад, ки дар ҷамоатҳои деҳоти ноҳия гашта,  маъюбони гурӯҳи якумро  тавонбахшӣ намуда, ҳуҷҷатгузории нафақаҳояшонро назорат менамоянд.
Шариф  Ғайратов, падари Мустафои 13-сола- тарбиятгирандаи муассисаи мазкур мегӯяд, баъд аз таълиму тарбия фахмишу  фикрронии фарзандаш 30 фоиз зиёд шудааст ва миннатдор аст, ки  табобати  кормандони ин муассиса ба  фарзандашон натиҷаи хуб дода истодааст.