Саҳми БДРХ дар буҳрони иқтисодии Тоҷикистон

Душанбе, 01.09.2015 (АМИТ «Ховар», Фарзонаи Давлат).-«Пурзӯр намудани ҳамкориҳои молиявӣ ва рушди бахшҳои реалии иқтисодиёт»- таҳти чунин ном имрӯз дар Кохи «Ваҳдат» семинар доир гардид, ки дар кори он доираи васеи институтҳои молиявии Тоҷикистонн иштирок намуданд.
Дар семинар ҳамчунин намояндагони Бонки рушди Чин ширкат варзида,  доир ба фаъолият ва доираи васеи ҳамкориҳои бонки мазкур маърӯза намуданд.
Ба гуфтаи мудири бахши муносибатҳои байналмилалии БДА «Амонатбонк » Темур Афғонов семинари мазкур барои баланд бардоштани сатҳи дониш ва огоҳӣ пайдо намудан аз навовариҳои ҷаҳони муосир дар рушди иқтисодиёт имкон медиҳад.
«Ба ҳамин ҳадаф мо ин семимнарро баргузор намудаем. Мақсади  ҳамкорӣ бо Бонки рушди Хитой он аст, ки мо тавонем аз ин бонк барои пешбурди иқтисодиёти кишварамон истифода барем »,- афзуд Афғонов.
Ба гуфтаи ӯ тайи шаш моҳи гузашта Чин тавассути Бонки рушди Хитой барои коҳиш додани таъсири буҳрони молӣ ба кишвар 10 миллион доллар додааст. Аз ин ҳисоб 35 дарсад барои бахши кишоварзӣ, 30 дарсад ба соҳаи истеҳсолот ва бақия барои рушди соҳибкории хурду миёна равона шудааст. 
Ба қавли Афғонов, дар панҷ соли гузашта Бонки давлатии рушди Чин танҳо тавассути “Амонатбонк” 42 миллион доларро барои иҷрои 73 тарҳ дар Тоҷикистон бо фоизи кам ва муҳлати тӯлонӣ дастрас кардааст. Ин масъули “Амонатбонк” мегӯяд, рӯзи 2 сентябр дар ҷараёни сафари Эмомалӣ Раҳмон ба Чин, миёни намояндаҳои Ҳукумати Тоҷикистон ва Бонки давлатии рушди Чин барои гирифтани 18 миллион доллари дигар созишнома ба имзо хоҳад расид, ки барои сохтмони бинои нави Амонатбонк дар маркази пойтахт харҷ хоҳад шуд. 
Ёдрас мешавем, ки чунин семинар аввалин маротиба аз ҷониби БДА «Амонатбонк» дар якҷоягӣ бо Бонки давлатии рушди Хитой гузаронида шуд, ки мақсад аз баргузории семинар густариши ҳамкориҳои бонкдории ду кишвар арзёбӣ гардид.