Семинар бо иштироки мутахассиси ХБА

Душанбе, 22.09.2015, (АМИТ «Ховар»). — 19 сентябри соли равон дар Бонки миллии Тоҷикистон бо иштироки кормандони департаменту идораҳои бонк дар мавзӯи “Идораи самараноки захираҳои байналмилалӣ” семинар баргузор гардид. Мутахассиси бахши молиявии Хазинаи байналмилалии асъор Винсент Флуриет маърӯза намуда, оид ба идораи самараноки захираҳо маслиҳатҳои муфид дода, ба саволҳои ҳозирин ҷавобҳои мушаххас дод.
Тибқи барномаи тасдиқшуда семинар аз ду бахш  “Идоракунии захираҳо бо назардошти хавфҳо” ва “Тақсимбандии стратегии захираҳо” иборат буд.
Дар семинар зикр гардид, ки мувофиқи тавсияҳои Хазинаи байналмилалии асъор оид ба захираҳои байналмилалии БМТ, аз рӯи якчанд ченак, аз ҷумла қарзҳои кӯтоҳмуддати давлатӣ ва ҳаҷми пули миллӣ кофӣ ва мусбат арзёбӣ шудаанд. Ҳамчунин таъкид гардид, ки дар ташкили захираҳо ҳадафҳои зерин: таъминнокии пардохтпазирӣ, идоракунии сатҳи қурби асъор бо мақсади коҳиши лаппишҳои он ва нигоҳ доштани муътадилии қурби пули миллӣ дар мадди аввал меистанд.
Дар қисми дуюми семинар иштирокдорони он оид ба ҷой доштани хавфҳои асъорӣ, бозорӣ, қарзӣ, пардохтпазирӣ, амалиётӣ ва ҳуқуқӣ дар идоракунии захираҳо муҳокимаронӣ намуда, паҳлӯҳои гуногуни хавфҳоро баррасӣ карданд.  
Семинари мазкур ба ташкили  ҳамкории зичу судманд бо ташкилоти бонуфузи молиявӣ мусоидат менамояд. Иштирокдорони семинар дар самти рушди дарозмуддат ва самаранокии идоракунии захираҳои байналмилалӣ пешниҳодҳоро қабул карданд.