Суғд: Баргузории мусобиқаи шашка ва шоҳмот миёни нобиноён

Хуҷанд, 16.09.2015. (АМИТ “Ховар”, Абдуаҳад Шарифзода).-Аз 11 то 14 сентябри соли ҷорӣ дар маркази Суғд- шаҳри Хуҷанд бо ташаббуси Раёсати ҷавонон, варзиш ва сайёҳии вилояти Суғд дар ҳамкорӣ бо Ташкилоти ҷамъиятии нобиноён  мусобиқаи кушоди вилоятӣ оид ба шашка ва шоҳмот байни мардон ва занони нобиною маъюб гузаронида шуд.
Тавре ки ба АМИТ “Ховар” мутахассиси Раёсати ҷавонон, варзиш ва сайёҳии вилоят Қобилхӯҷа Обидов иттилоъ дод, мусобиқа тӯли се рӯз дар меҳмонхонаи «Эҳсон» баргузор гардида, дар он 24 намоянда-варзишгар, ки аз 6 нафараш зан буд,  аз шаҳру ноҳияҳои вилоят, аз ҷумла Хуҷанд, Исфара, Истаравшан, Конибодом, Чкалов, Ҷаббор Расулов, Б.Ғафуров, Шаҳристон  иштирок намуданд. 
Дар анҷоми мусобиқа ғолибон ва иштирокдорон бо туҳфаҳои  Раёсати ҷавонон, варзиш ва сайёҳии вилояти Суғд ва бахши суғдии Кумитаи Имдоди имом Хумайнӣ сарфароз гардиданд.