Ёрии ҳукумати Британияи Кабир ба осебдидагони вилояти Бадахшон

Душанбе, 18.09.15. (АМИТ «Ховар»). — Ҳукумати Британияи  Кабир,  аз ҷумла Вазорати  рушди байналмилалӣ  барои аҳолии  ноҳияҳои  вилояти  Бадахшони  Тоҷикистон, ки бар  асари  обхезӣ ва фуромадани  ярч  осеб  дидаанд,  чун ёрии  башардӯстона  217  ҳазор  доллари  ИМА  пешниҳод  кард. Ҳамзамон  Вазорати  рушди байналмилалӣ  барои ташкили  «Ёрии башардӯстонаи  Фокус» — и  намояндагии Хазинаи Оғохон  147 ҳазор  доллар  ҷудо  кардааст,  ки  он  барои  пурра  гардонидани  захираҳои  таъҷилӣ,  арзёбии  хавфи  обхезиҳои  эҳтимолӣ ва сохтмони  канал  барои  ба  самти  дигар   равона  сохтани   оби   кӯли сунъӣ истифода  мешавад.
Ёрии  башардӯстона  имкон  медиҳад, ки   ба садҳо оила  (тахминан 600 нафар)  ёрӣ расонида,  вазъи  кӯл аз  нигоҳи батиметрӣ ба  навор  гирифта  шавад. Поккории  канал  ҳамчунин  ба 1300  нафар  сокинони 20  деҳаи  поёноб  ва  шаҳри  Хоруғ   имкон  медиҳад, ки  аз  обхезиҳои  эҳтимолӣ  раҳо  ёбанд.  Тоҷикистон дар  ҳошияи ҳамкорӣ  бо ЮНИСЕФ ва Вазорати рушди  байналмилалии Британияи  Кабир  аз ёрии башардӯстонаи вазорати  зикршуда  баробари  71  ҳазор  доллар бархӯрдор  шудааст.