Афғонистон аз қарори Амрико дар мавриди боқӣ мондани нерӯҳояш дар ин кишвар истиқбол кард

Душанбе, 17.10.2015 (АМИТ «Ховар»).- Афғонистон аз қарори Вашингтон дар мавриди тамдиди муҳлати боқӣ мондани неруҳои амрикоӣ дар хоки Афғонистон истиқбол кард, — иттилоъ медиҳад бо такя ба баёнияи маъмурияти президенти ИМА «Хома Пресс».
Рӯзи панҷшанбе Барак Обама, президенти ИМА эълон кард, ки неруҳои амрикоӣ аз Афғонистон дар охири соли 2016 пурра бароварда намешаванд. 5,5 ҳазор хизматчиёни ҳарбӣ дар ин кишвар баъд аз соли 2016 низ боқӣ хоҳанд монд. Ҳоло шумораи низомиёни ИМА дар Афғонистон 9,8 ҳазор нафарро ташкил медиҳад. 
Дар баёнияи маъмурияти Президенти Ҷумҳурии Исломии Афғонистон омадааст, ки ин тасмими Иёлоти Муттаҳидаи Амрико дар асоси созишномаи дуҷониба оид ба амният ва созишнома дар бораи ҳамкории стратегии миёни ду кишвар гирифта шуд. Қарори мазкур  ба таҳкими манфиатҳои умумӣ, субот ва рушди Афғонистон, инчунин мубориза бар зидди терроризм дар минтақа ва ҷаҳон мусоидат мекунад.