Афзоиши захираи ангишт дар анборҳои корхонаҳои соҳа

Душанбе, 27.10.2015 (АМИТ «Ховар»).-Тибқи нақша бо назардошти мавсимӣ будани коркарди конҳо аз 18 корхонаи истеҳсолӣ 15 корхона ба истихроҷи ангишт машғул мебошад. 
Ба иттилои Вазорати саноат ва технологияҳои нав истихроҷи ангишт аз аввали сол то имрӯз, 27 октябри  соли ҷорӣ ба 858 ҳазор тонна расонида шудааст, ки нисбат ба ҳамин давраи соли сипаригардида 182 ҳазор тонна зиёд мебошад. Фурӯши ангишт дар ин давра 751 ҳазор тонна ё  87,5 фоизи ангишти дар соли ҷорӣ истихроҷгардидаро ташкил медиҳад.
То  даҳаи аввали моҳи октябри соли равон аз ҷониби вазорату идораҳои дахлдор дар муассисаҳои буҷавӣ бо назардошти бақияи соли сипаригардида ба миқдори 45556,6 тонна ангишт захира  шудааст. 
Дар айни замон, истихроҷи шабонарӯзии ангишт ба ҳисоби миёна 3000-4000 тоннаро ташкил медиҳад, ки муштариён метавонанд аз нуқтаҳои махсуси фурӯши ангишт ва анборҳои корхонаҳои соҳаи ангишт харидорӣ намоянд.