Ҳамкории БМТ бо СМВК Европа лтд

Душанбе, 26.10. 2015. (АМИТ «Ховар»). -Раиси Бонки миллии Тоҷикистон Ҷамшед Нурмаҳмадзода 24 октябр бо  Масихико Ошима — директори генералии бонки Сумитомо Митсуи Бэнкинг Корпорэйшен Европа лтд (СМВК Европа лтд)  мулоқот доир намуд. 
Раиси Бонки миллии Тоҷикистон Ҷамшед Нурмаҳмадзода меҳмононро бо вазъи макроиқтисодӣ ва низоми бонкии ҷумҳурӣ, аз ҷумла қурби асъори миллӣ, тавозуни пардохт, сатҳи таваррум шинос намуда, изҳор дошт, ки бо вуҷуди идома ёфтани буҳрони иқтисодию молиявӣ дар ҷаҳон рушди иқтисодиёти ҷумҳурӣ дар нуҳ моҳи соли равон 6,2 фоизро ташкил намуд, сатҳи таваррум ба 3,6 фоиз баробар шуд, ки назар ба ҳамин давраи соли гузашта 2,1 банди фоизӣ паст аст. Ҳамчунин дар ин давра ҳаҷми пасандозҳои аҳолӣ дар ташкилоти қарзӣ ба андозаи 22 фоиз зиёд шуд.  Маблағҳои қарзие, ки аз ҷониби бонкҳо ба ноҳияҳои дурдасти кӯҳӣ, корхонаҳо ва соҳибкороне, ки ҷойҳои нави корӣ ташкил менамоянд, дода шудаанд, хеле афзуданд. Номбурда дар идомаи суҳбат зикр намуд, ки чун дар дигар давлатҳои олам дар натиҷаи буҳрони молиявию иқтисодии ҷаҳонӣ дар ҷумҳурии мо, бахусус дар низоми бонкии кишвар баъзе мушкилот ба миён омадаанд ва барои бартараф намудани онҳо моро зарур аст, ки доираи ҳамкории байналхалқии худро васеъ намуда, кумаку дастгириҳои техникиро ҷалб намоем. 
Таъкид гардид, ки Бонки миллии Тоҷикистон барои ба роҳ мондани ҳамкорӣ дар бахши омода намудани мутахассисон, табодули таҷриба ва ҷалби кумакҳои техникӣ дар самти технологияҳои информатсионӣ бо СМВК Европа лтд ҳавасманд мебошад. 
Директори генералии бонки Сумитомо Митсуи Бэнкинг Корпорэйшен Европа лтд  Масихико Ошима бо хушнудӣ изҳор намуд, ки ин рӯз барои ӯ ҳамчун рӯзи махсус, яъне оғози ҳамкориҳои дуҷониба бо Бонки миллии Тоҷикистон ба ҳисоб меравад. Ҷаноби Масихико Ошима иброз дошт, ки умедвор аст минбаъд бонки онҳо дар инкишофи иқтисодиёти Тоҷикистон ва низоми бонкии он саҳми худро хоҳад гузошт. 
Номбурда омодагии хешро дар расонидани дастгирии техникӣ дар бахши технологияҳои информатсионӣ, омӯзиш ва такмили ихтисоси соҳаи бонкӣ ва оғоз намудани ҳамкории дуҷониба бо бонкҳои тиҷоратии Тоҷикистон баён намуд.