Ҷасорати корманди милитсия зани 38-соларо аз марг наҷот дод

Душанбе, 26.10. 2015. (АМИТ «Ховар»). —  Зарина Нурматова, сокини 38-солаи ноҳияи Б.Ғафуров, ҷамоати деҳоти Ёва 23-юми октябри соли равон, тахминан соати 10:40 дақиқа бо мақсади худкушӣ худро дар рӯ ба рӯи бинои шуъбаи ВКД дар шаҳри Хуҷанд ба дарёи Сир партофтааст. 
Сержанти  хурди милитсия Фирӯз Раҳматов милитсионери ротаи хадамоти посбонӣ-пайраҳадории милитсияи ШВКД дар шаҳри Хуҷанд, ки дар басти навбатдорӣ қарор  дошт, бо воқиф шудан аз ҳолати мазкур Заринаро наҷот дод. Амали саривақтии ӯ боис шуд, ки ҳаёти як инсон ҳифз  шавад.
Бино ба иттилои хадамоти матбуоти ВКД,  дар давоми соли ҷорӣ дар ҳудуди шаҳри Хуҷанд ин сеюмин ҳодисаи сӯиқасд ба худкушӣ мебошад, ки аз тарафи кормандони милитсия пешгирӣ  мешавад.