Баррасии масъалаҳои рушди соҳибкорӣ ва сармоягузорӣ дар Китобхонаи миллии Тоҷикистон

Душанбе, 14.10.2015. (АМИТ «Ховар») .- Имрӯз, 14 октябр дар  шаҳри Душанбе Форуми байналмилалии соҳибкории Душанбе-2015 таҳти унвони «Саҳми соҳибкорӣ ва сармоягузорӣ дар рушди устувор» дар доираи таҷлили «Рўзи соҳибкор» ба кори худ оғоз кард.
Форум дар толорҳои Муассисаи давлатии Китобхонаи миллии Тоҷикистон дар бахшҳои алоҳида сурат гирифта, дар он  масъалаҳои мубрами рушди соҳибкорӣ ва сармоягузорӣ баррасӣ мегарданд.  
Дар назар аст, ки дар бахши якуми Форум Ҷалби сармоя — дастовардҳо ва монеаҳо масъалаҳои Ҷумҳурии Тоҷикистон: рў ба сўи соҳибкорӣ, давлат барои ҳамкорӣ ва шарикӣ, истифодаи афзалиятҳои рақобатпазирӣ, тадбирҳо барои дастгирии соҳибкорону сармоягузорон дар шароити буҳронӣ, ҳамкории минтақаваӣ — истифодаи имкониятҳои сармоягузорӣ ва имкониятҳои минтақаҳои озоди иқтисодӣ дар рушди соҳибкориву сармоягузорӣ баррасӣ гарданд.
Бахши мазкур таҳти сарварии вазири рушди иқтисод ва савдои Ҷумҳурии Тоҷикистон Неъматулло Ҳикматуллозода доир гардида, мавзуъҳои пешниҳодшуда ба таври васеъ мавриди баррасӣ қарор хоҳанд гирифт.  
Дар ин робита, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим, роҳбари Департамент оид ба идоракунии давлатӣ, молия ва савдои Бонки Осиёии Рушд Ҳарриет Элизабет Вилкинсон, и.в. директори Маркази байналмилалии Истанбул оид ба рушди бахши хусусӣ Гулчин Салинган, сардори Департаменти омўзиш ва инноватсияи Бонки ҷаҳонӣ Бенҷамин Ҳерзберг, Президенти Гурӯҳи саноатии «Эрон Худрав» Ҳошим Якказарра, ноиби Президенти Институти ИстВест, Сафир Мартин Флейшер ва муовини вазири рушди иқтисод ва савдои Ҷумҳурии Тоҷикистон Умед Давлатзод сухан мегӯянд.
Вобаста ба масъалаҳои баррасишаванда миёни иштирокчиён мубодилаи афкор ва баҳсу мунозира сурат мегирад.