Беҳтар гардидани ҳолати 6450 километр роҳҳо дар вилояти Суғд

     Душанбе, 21.10.2015. (АМИТ “Ховар”). —  Дар доираи барномаҳои қабулшуда, бунёд гардидани 380 корхонаву коргоҳҳои хурду миёна бо зиёда аз 8 ҳазор ҷойи корӣ, беҳтар гардидани ҳолати 6450 километр роҳҳо, мавриди истифода қарор гирифтани 59 иншооти гуногуни соҳаҳои тандурустиву  сохтмон, таъмиру навсозии 163 иншооти соҳаи маориф, 44 иншоот дар соҳаи фарҳанг ва  аз худ гардидани 330 гектар заминҳои нав аз натиҷаҳои хуби бадастомада гувоҳӣ медиҳанд. Ин нуктаро 21 октябр Президенти Ҷумҳурии Тоҷикистон Эмомалӣ Раҳмон зимни мулоқот бо роҳбарону фаъолони  вилояти Суғд иброз намуд.
Сарвари давлат илова намуд, ки дар қаламрави вилояти Суғд тайи даҳ соли охир дар соҳаҳои маорифу тандурустӣ, кишоварзӣ, обрасонӣ, нақлиёту энергетика, хоҷагии манзиливу коммуналӣ ва гумруку андоз 45 лоиҳаи сармоягузории давлатӣ ба маблағи умумии 6 миллиард сомонӣ мавриди амал қарор дошт, ки аз он 33 лоиҳа ба маблағи 5,2 миллиард сомонӣ ба анҷом расида, ҳоло татбиқи 12 лоиҳаи дигар бо маблағи беш аз 750 миллион сомонӣ идома дорад. 
Илова бар ин, дар ҳашт моҳи соли ҷорӣ бо мақсади рушди иқтисодиёти вилоят ба маблағи 656 миллион сомонӣ сармоягузорӣ суръат гирифтааст, ки  429 миллион сомонӣ ё 66 фоизи онро сармояи мустақим ташкил медиҳад.