Боздошти занон барои хариду фурӯши ноболиғон

Душанбе, 07.10.2015. (АМИТ «Ховар»).-Кормандони милитсия се  занеро дастгир карданд, ки ба хариду фурӯши тифлони навзод айбдор мешаванд.
Бино ба иттилои Вазорати корҳои дохилии кишвар, рӯзи 6-уми октябри соли равон зимни гузаронидани чорабиниҳои фаврию ҷустуҷӯӣ аз ҷониби кормандони милитсия зани 23-солаи сокини шаҳри Кӯлоб бо гумони фурӯши тифли навзод дастгир шуд. Гумонбаршуда дар меҳмонхонаи “Мурод Боқӣ”, воқеъ дар кӯчаи Ваҳдати шаҳри Қурғонтеппа ба зани 27-солаи сокини шаҳри Қурғонтеппа тифли навзоди ҷинсаш мардро ба маблағи 300 сомонӣ фурӯхтааст. Ҳамчунин дар ин рӯз зани 30-сола, сокини ноҳияи Бохтар низ бо гумони хариду фурӯши тифли навзод дастгир гардид, ки гумонбаршуда, 29-уми сентябри соли 2015 дар меҳмонхонаи мазкур ба ҳамин зани 27-солаи сокини шаҳри Қурғонтеппа тифли навзоди ҷинсаш занро ба маблағи 1500 сомонӣ фурӯхтааст. 
Аз рӯи ин ҳодисаҳо парвандаи ҷиноятӣ оғоз гардида, тафтиш идома дорад.