Д.Ҳабибов: «Занони соҳибкор бояд нақшаҳои устувори соҳибкорию тиҷоратиро тартиб диҳанд»

Душанбе, 08.10.15. (АМИТ «Ховар»). — «Имрӯз  занон  дар  рушди  соҳибкории  ҷумҳурӣ  мақоми  хоса доранд. Президенти  кишвар  ва роҳбарияти он  барои  дастгирии  занони соҳибкор чораҳои  зарурӣ  мебинанд. Имрӯз  фаъолияти занони  соҳибкор  назаррас  буда,  натиҷаҳои  дилхоҳ  мебахшанд», — гуфт  ба хабарнигори  АМИТ «Ховар»  сардори Раёсати  дастгирии  соҳибкории Кумитаи  давлатии  сармоягузорӣ  ва идораи  амволи  давлатии Тоҷикистон  Давлат  Ҳабибов дар ҷараёни  форум  оид  ба  рушди  соҳибкорӣ  байни   занони Тоҷикистон.
Ба  гуфтаи  мусоҳиб, занони  соҳибкор, ки  аз  дастгирии  давлат бархӯрдоранд,  бояд  нақшаи  устувори соҳибкорию тиҷоратиро  тартиб  диҳанд, ки  он  ҳам барои  худу аҳли оилаи  вай  ва  ҳам  барои  ҷумҳурӣ муфид  аст. 
«Форуми  имрӯза  ба  манзури  фароҳам овардани  шароити  мусоид  барои  рушди соҳибкории байни   занон,  ҳамчунин  роҳандозии  ҳамкории  мутақобилан  муфид дар  чунин  соҳаҳои барои ҷумҳурамон муҳим,  аз  қабили  кишоварзӣ,  косибӣ,  коркарди  ашёи  хоми  ватанӣ,  созмон  дода шудааст», — афзуд Давлат  Ҳабибов.