Дар Душанбе Намоишгоҳи Agrofood-2015 доир мешавад

Душанбе, 09.10.15. (АМИТ «Ховар»). — Бо  ибтикори Палатаи  савдо  ва  саноати  Ҷумҳурии  Тоҷикистон  ва Expo Central Asia 14 —  16  октябр  дар  Маҷмааи давлатии  Коҳи  Борбад — и  шаҳри  Душанбе намоишгоҳи  сеюми  байналмилалии кишоварзӣ,  саноати  хӯрокворӣ  ва  бастабандии Agrofood-2015 доир  мегардад. 
Намоишгоҳ  ба  манзури  фароҳам  овардани имкониятҳои нав  барои фурӯши  маҳсулот,  пайдо  намудани  кормандони нави  ихтисосӣ  ва ба бозор  баровардани амволи нав созмон  дода  мешавад.
Дар  ин  ҷо техникаю  таҷҳизоти  кишоварзӣ, тухмию  ниҳол,  технологияҳои обёрӣ, маҳсулоти  боғдорию  гулпарварӣ ва таҷҳизоти  мухталиф, ҳамчунин маҳсулоти  ширӣ,  моҳӣ, сабзавот, мева,  консерв, нону  кулча,  маснуоти  қаннодӣ,  шарбатҳои гуногун  ва таҷҳизоти  таббохӣ  низ  ба маърази  намоиш  гузошта  мешавад.
Меҳмонони  намоишгоҳ бо таҷҳизот ва технологияи  коркарди  маводи  ғизоӣ,  бастабандӣ  ва таҷҳизоти он, ҳамчунин  таҷҳизоти  коркарди  шир ошноӣ  пайдо  мекунанд.
Ёдовар  мешавем, ки Expo Central Asia созмондиҳандаи  бонуфузи намоишгоҳҳои  байналмилалӣ  буда, аз  соли  2010 бо  Тоҷикистон  ҳамкорӣ дорад.