Дар Суғд барои беш аз 41 ҳазор хонанда мактабҳои нав бунёд шудааст

Душанбе, 21.10.2015. (АМИТ “Ховар”). –Дар давоми 10 соли охир тавассути ҳамаи сарчашмаҳои молиявӣ дар вилояти Суғд барои беш аз 41 ҳазор хонанда мактабҳои нав ва синфхонаҳои иловагӣ, беморхонаҳо бо 924 кат ва дармонгоҳҳо барои қабули 995 нафар дар як баст сохта, ба истифода дода шудаанд. Дар ин бора Президенти кишвар Эмомалӣ Раҳмон зимни суханронӣ дар мулоқот бо роҳбарону фаъолони вилояти Суғд 21 октябр иброз дошт.
Сарвари давлат аз пурра ҳал шудани масъалаи норасоии муассисаҳои таълимии вилояти Суғд бо омўзгорон изҳори қаноатмандӣ намуда, тазаккур дод, ки акнун мо бояд кўшиш кунем, омўзгорон мунтазам сатҳи касбии худро баланд бардоранд, аз курсҳои бозомўзӣ гузаранд ва таҷрибаи муосирро азхуд карда, дар ҷараёни таълим ҷорӣ созанд.