Дар заминларзаи Афғонистон беш аз 260 нафар ҳалок шуд

Душанбе, 27.10.2015. (АМИТ «Ховар»). — Теъдоди фавтидагони заминларзаи Афғонистон ба беш аз 260 нафар расид. 
Дар Покистон 228 нафар ҳалок гашта, беш аз 1000 нафар ҷароҳат бардоштанд. Дар навбати худ ҳукуматдорони Афғонистон иттилоъ доданд, ки 33 нафар фавтида, беш аз 200 тани дигар ҷароҳат бардоштаанд. 
Ҳукуматдорони Ҳиндустон низ оид ба фавти 2 нафар дар минтақаи Кашмир иттилоъ доданд.
Ёдовар мешавем, ки дирӯз соати 13.39 вақти маҳаллӣ дар Афғонистон зилзила бо қувваи 7,5 бал ба амал омад. Маркази зилзила дар умқи 212,5 километр дар километри 45-уми қисмати ҷанубу ғарбӣ аз шаҳри Ҷурм ҷойгир будааст.  Ларзишҳои зеризаминӣ дар кишварҳои Осиёи Ҷанубӣ ва Марказӣ низ эҳсос гардиданд.