Дарко Бонетс суботи молиявӣ ва сиёсати макропруденсиалӣ дар Словенияро баррасӣ кард

Душанбе, 07.10.2015 (АМИТ Ховар).- Дар доираи барномаи кумаки техникии Хазинаи байналхалқии асъор ба Бонки миллии Тоҷикистон ҳайати Гурӯҳи кории он ба ҷумҳурӣ ташриф овард.  Муовини раиси Бонки марказии Словения ҷаноби Дарко Бонетс    дар ҳузури муовини якуми раиси Бонки миллии Тоҷикистон Ҷ.Нуралиев,  муовини раиси бонк ҷаноби У.Латифов ва  ҷамъи роҳбарони департаменту идораҳои марбута вобаста ба “Суботи молиявӣ ва сиёсати макропруденсиалӣ дар Словения” маърӯза  кард.
Дарко Бонетс масъалаҳои асосӣ ва муҳимро дар мавриди  таҳлили суботи молиявӣ, таҳия ва татбиқи сиёсати макропруденсиалӣ, ташкили воҳиди сохтории масъул, таҳияи моделҳо барои муайян сохтан ва мониторинги хавфҳои суботи молиявӣ, инчунин дар хусуси аз ҷониби Низоми аврупоии назорати молиявӣ ба роҳ мондани назорати макропруденсиалӣ дар минтақаи Аврупо мавриди  баррасӣ қарор дод.      
Дар ҷараёни вохӯрӣ таъкид гардид, ки мақсади асосии сиёсати макропруденсиалӣ- ин пеш аз ҳама, нигоҳ доштани суботи низоми молиявӣ бо роҳи баланд бардоштани устувории низоми молиявӣ ва коҳиш додани хавфҳои он мебошад, ки дар навбати худ метавонад саҳми босазои бахши молиявиро дар рушди иқтисодиёти кишвар таъмин намояд.
Бешубҳа, таҷрибаи пешрафта ва санҷидашудаи бонкдорон дар Аврупо метавонад ҳангоми мавриди истифода қарор додани он дар фаъолияти Бонки миллии Тоҷикистон барои дар сатҳи зарурӣ ба роҳ мондани кори Идораи суботи молиявӣ ва таҳлили хавфҳо саҳми босазо гузорад.