«Фарҳанги англисӣ-тоҷикӣ» ба нашр расид

Душанбе, 06.10.2015, (АМИТ «Ховар»).-Чанде қабл луғати  такмилшудаи фарҳангнигори маъруфи тоҷик, доктори илмҳои филологӣ, профессор, забоншинос, мутарҷим, луғатнигор Абдусалом Маманазаров бо номи «Фарҳанги англисӣ-тоҷикӣ» дар чопхонаи «ЭР-граф» бо сифати олӣ аз чоп баромад. Фарҳанги мазкур 100 000 калимаю ибора, 200 000 тарҷума, шарҳ ва тафсири вожаҳо, 8000 ҷумла ва 1000 зарбулмасалу мақолро фаро гирифта, дар натиҷаи таҷрибаи 20-солаи кори фарҳангнигории муаллиф ба миён омадааст.
Муаллиф зиёда аз 20 асари илмӣ, таърихию фарҳангиро бевосита аз забони англисӣ ба тоҷикӣ ё аз тоҷикӣ ба англисӣ тарҷума кардааст: «Ҳукумати Амрико», соли 1994, Вена, «Таърихи Амрико»-1997, Вена, «Бунёди давлатдории навин»-2002, Маскав, «Президенти мо»-2006, Маскав ва ғ. 
Муаллиф солҳои 1996-1998 ба ҳайси ҳамкотиби Комиссияи муштараки Ҳукумати Тоҷикистон барои таъсиси Донишгоҳи байналмилалӣ дар шаҳри Хоруғ  ба кишварҳои Осиёи Марказӣ, Русия, Амрико, Канада, Англия, Швейтсария, Фаронса, Покистон ва Непал сафар карда, бо мактабҳои олии пешқадамтарини ин кишварҳо аз наздик шинос шудааст. 
Ба назар мерасад, ки «Фарҳанги англисӣ-тоҷикӣ» мукаммалтарин луғати дузабона ба шумор меравад.