Истихроҷи ангишт ба 800 ҳазор тонна расонида шуд

Душанбе, 12.10.2015 (АМИТ «Ховар»).-Вазорати саноат ва технологияҳои нави Ҷумҳурии Тоҷикистон барои гузаронидани давраи тирамоҳу зимистони солҳои 2015-2016  тадбирҳои зарурӣ андешида, ҷиҳати иҷрои саривақтии нақшаю уҳдадориҳо вобаста ба таъмин намудани МБГ Душанбе-2, аҳолӣ ва соҳаҳои маориф ва бо ангишт дастурҳои мушаххас медиҳад.
Истихроҷи ангишт аз аввали сол то имрӯз, 12 октябри  соли ҷорӣ ба 800 ҳазор тонна расонида шудааст, ки нисбат ба ҳамин давраи соли сипаригардида 185 ҳазор тонна зиёд мебошад. Фурӯши ангишт дар ин давра 698 ҳазор тоннаро ташкил медиҳад.
Мувофиқи маълумоти вазорату идораҳои дахлдор,  талаботи муассисаҳои буҷавӣ дар соли ҷорӣ 50377,6 тоннаро ташкил дода, то 6 октябри соли равон бо назардошти бақияи соли сипаригардида ба миқдори 45556,6 тонна ангишт захира шудааст. Аз ҷумла, соҳаи маориф — бо 35905,3 тонна, соҳаи тандурустӣ бо 5918,3 тонна ва сохторҳои қудратӣ бо 3733 тонна таъмин гардидаанд. 
Ҳоло истихроҷи шабонарўзии ангишт ба ҳисоби миёна 4500-7500 тоннаро ташкил медиҳад, ки муштариён метавонанд онро аз нуқтаҳои махсуси фурўши ангишт ва анборҳои корхонаҳои соҳаи ангишт харид намоянд.