«Иттиҳоди иқтисодии Авруосиё: гумрук ва иқтисодиёт»-форум ва намоишгоҳ

Душанбе, 23.10.2015. (АМИТ «Ховар»). -Сардори Хадамоти гумруки назди Ҳукумати Ҷумҳурии Тоҷикистон Абдуфаттоҳ Ғоибов  дар форум ва намоишгоҳи байналмилалии «Хадамоти гумрукӣ- 2015», ки ҳафтаи ҷорӣ дар Маскав баргузор шуд,  иштирок намуд. Дар форум  ва намоишгоҳ, ки  таҳти шиори «Иттиҳоди иқтисодии Авруосиё: гумрук ва иқтисодиёт» баргузор гардид, намояндагони 32 кишвари дунё иштирок доштанд.
Намоишгоҳе, ки дар Маркази нигораҳои  Маскав гузашт,  диққати ҳамаи хадамоти  гумруки  ҷаҳонро ба худ ҷалб намуд. Зиёда аз 100 нигораи намоишгоҳ  кори  имрӯзаи хадамоти гумрукро, аз терминалҳои калон то шуъбаҳои хурди минтақавӣ  нишон доданд.  Таваҷҷуҳи махсус ба технологияи иттилоотӣ зоҳир шуд, зеро имрӯз тамоми ҳуҷҷатҳо  ба шакли электронӣ гузаронида шуда истодаанд. 
Бояд зикр  кард, ки як рӯз пеш аз оғози намоишгоҳ Абдуфаттоҳ Ғоибов, сардори  Хадамоти гумруки назди Ҳукумати Ҷумҳурии Тоҷикистон бо Андрей Белянинов, сардори Хадамоти гумруки Федератсияи Русия мулоқот намуд. Дар ҷараёни мулоқот масоили ҳамкорӣ миёни мақомоти гумрукии ҳарду давлат баррасӣ гаштанд. Сардори Хадамоти гумруки Тоҷикистон, аз ҷумла, ба таъмини фаъолияти  кинологии хадамоти Русия, омӯзиши мутахассисони кинолог, тартиби парвариш ва омодасозии сагҳои хизматӣ  мароқ зоҳир намуд. 
Абдуфаттоҳ Ғоибов ба ҳамкории байни мақомоти гумруки Тоҷикистон ва Хадамоти гумруки федералии Русия дар тарбияи кадрҳои касбӣ дар ҷумҳурӣ баҳои баланд дода,  барои таҳкими ҳамкорӣ дар соҳаи илму маориф изҳори умед кард.
 «Мо медонем, ки дар Академияи гумрукии Русия тоҷикон низ таълим мегиранд ва он ҷо сол то сол технологияҳои инноватсионии нав барои  таълим ҷорӣ гардида,  иқтидори илмӣ рушд меёбад ва робитаҳои байналмилалӣ низ беҳтар мегарданд.  Ҳамаи ин барои баланд бардоштани сифати таълиму тарбия мусоидат карда, ба тайёр намудани  мутахассисони салоҳиятдор барои  мақомоти гумрук, аз ҷумла барои  Тоҷикистони соҳибистиқлол   имкон медиҳад»,-баён дошт сардори Хадамоти гумрук.
Дар мулоқот, ки дар фазои дӯстона ва корӣ гузашт, ҷонибҳо зикр карданд, ки солҳои охир муносибатҳо байни ду хадамот  рушд меёбанд.  Дар  заминаи таҳкими робитаҳои иқтисодӣ миёни ду кишвар, аз хадамоти гумрук  даъват ба амал оварда шуд, ки  пурра ба густариши ин ҳамкорӣ  мусоидат намоянд. 
Дар мулоқоти роҳбарони Хадамоти гумрук Сафири Фавқулодда ва Мухтори Ҷумҳурии Тоҷикистон дар Федератсияи Русия Имомуддин Сатторов низ иштирок дошт.