Изҳори нигаронии Эмомалӣ Раҳмон аз пинҳонкории соҳибкорон

Душанбе, 14.10.2015 (АМИТ «Ховар»). -Имрӯз  зимни суханронӣ дар Форуми байналмилалии соҳибкории Душанбе-2015  Сарвари давлат Эмомалӣ Раҳмон  аз пинҳонкории соҳибкорон, яъне пинҳон кардани даромадҳояшон аз мақомоти андоз ва гумрук ва зарари чунин корҳо ба даромадҳои буҷети давлатӣ изҳори нигаронӣ намуда, гуфт: «Тафтишу санҷишҳои молиявӣ ва чорабиниҳои фаврӣ-тафтишотии аз ҷониби мақомоти дахлдор гузаронидашуда нишон медиҳанд, ки як қисми соҳибкорон талаботи қонунгузориро риоя накарда, ба амалҳои ғайриқонунӣ, аз ҷумла бо роҳи қочоқ ворид намудани молу маҳсулот, рўйпўш намудани андозҳо ва пардохтҳои гумрукӣ, изофанависии ҳаҷми корҳои таъмиру сохтмон аз ҳисоби маблағгузориҳои буҷетӣ, бо мақсади пинҳон кардани камбудиву норасоиҳои молиявӣ дуруст ба роҳ намондани ҳисобу китоби муҳосибӣ даст мезананд ва ҳатто баъзе аз онҳо бо роҳи додани ришва мехоҳанд қонуншиканиҳои худро рўйпўш намоянд».
Ҳамзамон таъкид шуд, ки дар фаъолияти субъектҳои соҳибкорӣ дар давоми солҳои 2011-2014 ва 9 моҳи соли 2015 ба маблағи 231 миллион сомонӣ зарари молиявӣ аз ҳисоби камомад ва тасарруфи воситаҳои пулию молӣ, изофанависии ҳаҷми корҳои сохтмон, талафи пулию молӣ аз бесарусомонӣ ва ҳолатҳои кам ҳисобӣ кардан ва рўйпўш намудани андозҳо ошкор шудаанд.