КМИР ба М. Достиев шаҳодатномаи вакилӣ супорид

     Душанбе, 06.10.2015.(АМИТ «Ховар»).-Комиссияи марказии интихобот ва раъйпурсии Ҷумҳурии Тоҷикистон 6 октябр  аз ҳавзаи ягонаи умумиҷумҳуриявӣ ба  Миралӣ Достиев мандати вакили Маҷлиси намояндагони Маҷлиси Олии Ҷумҳурии Тоҷикистон дода, ӯро ҳамчун вакили Маҷлиси намояндагони Маҷлиси Олии Ҷумҳурии Тоҷикистон ба қайд гирифта, ваколатҳояшро тасдиқ намуд ва ба ӯ Шаҳодатномаи вакилӣ супорид.
      Бояд зикр кард, ки Комиссияи марказии интихобот ва раъйпурсии кишвар  бинобар сабаби пеш аз муҳлат қатъ гардидани ваколати вакили Маҷлиси намояндагони Маҷлиси Олии Ҷумҳурии Тоҷикистон Низом Қосим пури Ҷаҳонгир, ки аз ҳавзаи ягонаи умумиҷумҳуриявӣ  интихоб шуда буд, тибқи моддаҳои 12,54 ва 57-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» дар бораи додани мандати  вакили Маҷлиси намояндагони Маҷлиси Олии Ҷумҳурии Тоҷикистон қарор қабул намуд, ки мувофиқи он мандати вакили Маҷлиси намояндагони Маҷлиси Олии Ҷумҳурии Тоҷикистон тибқи рӯйхати Ҳизби Халқии Демократии Тоҷикистон ба Миралӣ Достиев дода шуд.