Мақсад- бартараф намудани ғалатҳои имлоӣ дар лавҳаю овезаҳо

Душанбе, 2.10.2015. (АМИТ «Ховар»).-«Забони тоҷикӣ шоистаи мақоми волост ва бояд мо, забоншиносон ин забонро ҳамеша поку беолоиш нигоҳ дошта, нагузорем, ки ба он осебе расад»,-иброз дошт Ҷумъабой Азизқулов,  ходими пешбари Институти забон, адабиёт, шарқшиносӣ ва мероси хаттӣ имрӯз зимни ҳамоише бахшида ба Рӯзи забони давлатӣ, ки дар институти мазкур доир шуд.  Ҳамоиш таҳти унвони  «Симои лингвистии шаҳрҳо дар замони Истиқлол» доир гардид.   
Бояд гуфт, ки дар ҳамоиш намояндагон аз Кумитаи забон ва истилоҳоти назди Ҳукумати Ҷумҳурии Тоҷикистон, устодон аз донишгоҳу донишкадаҳо ва кормандони Институти забон, адабиёт, шарқшиносӣ ва мероси хаттӣ сухан карданд. 
Мақсади конфронс бартараф намудани ғалатҳои имлоӣ дар навиштаҷоти  шаҳрҳо буд, ки дар доираи он мутахассисони соҳа баҳсу суҳбатҳо анҷом доданд.