Маводи мухаддир “сарчашмаи молиявии” нооромиҳост

Душанбе, 30.10.2015. (АМИТ «Ховар»).- Агентии назорати маводи нашъаовари назди Президенти Ҷумҳурии Тоҷикистон бо дарки воқеии хатари паҳншавии нашъамандӣ, шомил шудан ба ҳизбу ҳаракатҳои тундрав аз тарафи бархе аз ҷавонон дар байни донишҷӯён ва устодони Донишкадаи давлатии тиҷорати Тоҷикистон тӯли силсилаи вохӯриҳоро баргузор намуд. Дар вохӯрӣ кормандони агентӣ, Вазорати корҳои дохилӣ ва Кумитаи ҷавонон, варзиш ва сайёҳӣ иштирок намуда, оид ба мушкилиҳое, ки имрӯз тамоми ҷомеаи ҷаҳониро ба ташвиш овардаанд суҳбат намуданд.
Кормандони агентӣ зикр намуданд, ки “сарчашмаи молиявии” аксарияти нооромиҳое, ки дар як зумра давлатҳои ҷаҳон рух дода истодаанд, аз фурӯши маводи мухаддир маншаъ мегирад ва қисми зиёди кушторҳои бераҳмона ва ҷиноятҳои мухталиф, ки аз тарафи гурӯҳҳои тундрав содир мешаванд, дар ҳолати истеъмоли маводи нашъаовар сурат мегиранд.
Иштирокдорон ҳамчунин дар мавриди  арҷгузорӣ ба муқаддасоти миллӣ, интихоби зиндагии солим, ҳаёти осоишта, машғул шудан ба варзиш, корҳои илмӣ, навоварӣ дар бунёди ҷомеаи солим сухан карданд.