Муҳокимаи дурнамои ҳамкории байнипарлумонӣ

Душанбе, 19.10.15. (АМИТ «Ховар»). — Раиси Палатаи  савдо  ва  саноати  Тоҷикистон  Шариф  Саид  ва президенти Палатаи  савдои музофоти Гургони  Эрон Рамазон Баҳромӣ зимни  мулоқот   масоили   ҳамкории дуҷонибаи  Тоҷикистон  ва  музофоти Гургони Эрон  дар  бахши  кишоварзиро  мавриди  муҳокима  қарор  дода,  ба  масоили  таъмини  кишоварзони  Тоҷикистон  бо  технологияю  таҷҳизоти  муосир  барои   коркарди  пурраи  меваю  сабзавот таваҷҷуҳи  хосса  зоҳир  намуданд.
Дар  ҷараёни  мулоқот  ҳамчунин  дурнамои   ҳамкории байнипарлумонӣ  баррасӣ  шуд.
Шариф  Саид  аз  фаъолияти  ПСС ҶТ  иттилоъ  дода,  зикр  намуд, ки  Палатаи савдо  ва  саноат ниҳоди ҷамъиятӣ  буда, соҳибкорону тоҷирони  Тоҷикиситонро  муттаҳид  сохта,  барои  ҳалли  масоили мубрами бахши  инфиродӣ,  иртиқои  рақобатпазирӣ ва   афзун  намудани  неруи  содиротии  кишоварзони Тоҷикистон  корҳои  назаррасро  анҷом  медиҳад.
Шариф  Саид  изҳори умедворӣ  намуд, ки  ҳамкории  дуҷониба  имкон  медиҳад,  барои  таъмини  амнияти  маводи  ғизоии  кишвар  саъю  кӯшиш ба  харҷ  дода шавад. Ӯ изҳор  дошт, ки  барои  расидан  ба  ин  мақсад  дар  ҳамаи  бахшҳои  иқтисодиёт  имкониятҳои  хубе  вуҷуд  доранд.