Мулоқоти дуҷониба байни соҳибкорону сармоягузорони ватанию хориҷӣ

Душанбе, 14.10.2015. (АМИТ «Ховар») .- Бахши  сеюми Форуми байналмилалии соҳибкории Душанбе-2015  таҳти сарварии раиси Бонки миллӣ Ҷамшед Нурмаҳмадзода дар мавзӯи Бозори хизматрасониҳои молиявӣ. Нақши ташкилоти молиявӣ дар рушди соҳибкорӣ дар Тоҷикистон ҷараён гирифт. Масъалаҳои асосии баррасишудаи ин бахш  ҷалби сармояи хусусӣ ба маҳсулоти нави молиявӣ, диверсификатсияи хизматрасонии молиявӣ, рушди бозори сармоягузории мустақим дар шароити бӯҳронӣ, иштирок  аз тариқи  ҳиссагузорӣ:  роҳҳои  баланд  бардоштани сармоягузории мустақим ва рушди фондҳои сармоягузорӣ, лизинг барои бизнеси хурду миёнаю суғуртаи хусусӣ ва воситаҳои нави маблағгузорӣ буданд.
Иштирокчиёни Форум мавзӯъҳои марбутаро ҳаматарафа баррасӣ карда, дар муҳокимаи масъалаҳо муовини якуми раиси Бонки миллии Тоҷикистон Ҷамолиддин Нуралиев, директори минтақавӣ барои кишварҳои ИДМ ва Аврупои Корпоратсияи Исломии рушди Бонки Исломии Рушд Самир Тагиев, роҳбари Намояндагии Бонки аврупоии таҷдид ва рушд дар Тоҷикистон Ричард Ҷонс, роҳбари Фонди сармоягузории «Ҳуеҷинг»-и Ҷумҳурии Мардумии Чин  Гуо Ҷин Ҷонг, директори ширкати суғуртавии «Бима» Санҷар Ҷабборов, раиси Раёсати БДА Тоҷикистон «Амонатбонк» Ҳакимзода Руҳулло Абдуғанӣ, раиси Раёсати ҶСП «Спитамен бонк» Петр Фабиан  сухан гуфтанд.
Дар ҳошияи Форум мулоқоти дуҷониба байни соҳибкорону сармоягузорони ватанию хориҷӣ сурат гирифт ва имконият фароҳам оварда шуд, ки соҳибкорон байни ҳамдигар мубодилаи афкор ва таҷриба намоянд.
Дар ҷаласаи алоҳида  таваҷҷуҳи асосӣ ба барқарор кардани робитаҳои тиҷоратӣ миёни ширкатҳо, сармоягузорон ва сохторҳои давлатӣ равона гардид.  Иштироккунандагон дар ин қисмат барои шиносоӣ ва омўзиши имкониятҳои ҳамкорӣ, шароит, интизориҳои сармоягузорон ва бахшҳои молиявӣ, инчунин сармоягузорӣ ба тиҷорати миллӣ имконияти фарох пайдо намуданд.