Намояндагони ширкати «Томсон Рейтерс» маҳсулоти худро муаррифӣ намуданд

Душанбе, 28.10.2015. (АМИТ «Ховар»). — Дар  Бонки миллии Тоҷикистон бо иштироки намояндагони сершумори ташкилоти қарзӣ 27 октябр муаррифии барномаҳо ва маҳсулоти яке аз ширкатҳои машҳури ҷаҳон «Томсон Рейтерс» оид ба ҷорӣ намудани майдони ягонаи савдо барои гузаронидани амалиёти пуливу қарзии Бонки миллӣ ва ташкилоти қарзии ҷумҳурӣ, мукаммал сохтани воситаҳои пулӣ, савдои коғазҳои қимматнок, анҷомдиҳии амалиёти асъорӣ ва назорати он дар бозори байнибонкӣ багузор гардид. 
Тавре ки аз хадамоти матбуоти бонк хабар доданд,  дар даҳаи дуюми моҳи августи соли равон чунин як вохӯрӣ бо намояндагони ширкатҳои «Блумберг» ва «Томсон Рейтерс» баргузор гардид ва баъди баррасии пешниҳоди маҳсулоти ширкатҳои мазкур намояндагони ташкилоти қарзии кишвар бо назардошти нархи мувофиқ доштани пардохти ҳаққи хизматрасонии терминалҳо ба тарафдории маҳсулоти ширкати «Томсон Рейтерс» ва ҳамчун платформаи ягона барои низоми электронии савдо интихоб кардани он овоз дода буданд. Дар давоми беш аз ду моҳи гузашта аксарияти ташкилоти қарзии мамлакат бо ширкати «Томсон Рейтерс» ҳамкориро ба роҳ монда, шартномаи заруриро ба имзо расониданд.