Қолинбофӣ дар Тоҷикистон рушд меёбад

Душанбе, 23.10.15. (АМИТ «Ховар»). — Дар  шаҳри  Душанбе татбиқи  лоиҳаи ЮНИДО барои навсозӣ ва баланд бардоштани сатҳи рақобатпазирии  бахши  қолинбофӣ, бахиядӯзӣ  ва  нассоҷӣ  дар  Тоҷикистон  оғоз  ёфт. Сарпарастони  расмии  лоиҳа Ҷумҳурии  Мардумии  Чин  ва  Федератсияи  Русия  ба  шумор  мераванд.
Дар  маросими рӯи  кор  овардани  лоиҳа  намояндаи  доимии  СММ  дар  Тоҷикистон Александр  Зуев,  сафири  Федератсияи Русия дар  Тоҷикистон  Игор  Лякин — Фролов,  сафири  ҶМЧ дар  ҶТ  Фан Сянжун  ширкат  доштанд.
Дар  ҷараёни  маросим  зикр  шуд, ки  дар кишвар «Барномаи  рушди қолинбофӣ дар Ҷумҳурии  Тоҷикистон барои давраи  солҳои  2014 — 2020» қабул  шудааст, ки эҳё ва  рушди  минбаъдаи  қолинбофӣ,  аз ҷумла  қолинҳои дастбофтро  пешбинӣ  менамояд.
Мақсад  аз  лоиҳаи  ЮНИДО  беҳдошти тавлиди  маҳсулот  ва  иртиқои  рақобатпазирии  корхонаҳои  қолинбофӣ,  бахиядӯзӣ  ва  нассоҷии  Тоҷикистон  аст.
Арзиши  умумии  лоиҳа  1  миллиону 200  ҳазор  доллари  ИМА — ро ташкил  медиҳад.