Ҷомеаи шаҳрвандӣ дар ислоҳоти милитсия иштирок мекунад

Душанбе, 03.09.2015, (АМИТ «Ховар»). — Бо мақсади боз ҳам наздик намудани ҳамкории милитсия бо мардум, афзудани боварии халқ ба он, инчунин барои мувофиқ гардонидани фаъолияти милитсия ба меъёрҳои байналмилалӣ, Ҳукумати Ҷумҳурии Тоҷикистон тасмим гирифтааст, ки ислоҳоти милитсияро амалӣ гардонад. Ин иқдоми Ҳукумат аз тарафи созмонҳои байналхалқии ҳимояи ҳуқуқи башар ва САҲА ҳамаҷониба дастгирӣ ёфт.
 Вобаста ба ин моҳи майи соли равон Шӯрои ҷамъиятӣ оид ба мусоидати ҷомеаи шаҳрвандӣ ба ислоҳоти милитсияи назди Раёсати ВКД дар вилояти Суғд таъсис ёфтааст, ки дар муҳокимаи санадҳои меъёриву ҳуқуқии ислоҳоти милитсия иштирок мекунад. Рӯзҳои 25-26 сентябри соли 2015 дар ш. Қайроққум бо иштироки Ҳамоҳангсози миллӣ оид ба ислоҳоти милитсия, Бобоназарзода А., роҳбарият ва кормандони РВКД ҶТ дар вилояти Суғд, намояндагони САҲА дар Тоҷикистон Маҳмадиев Ҳ., Аминов У. ва аъзои Шӯрои ҷамъиятӣ оид ба мусоидати ҷомеаи шаҳрвандӣ ба ислоҳоти милитсияи назди РВКД дар вилояти Суғд машварат баргузор гардид. Иштирокдорони машварат ҳуҷҷатҳои муҳимтаринеро, ки барои амалӣ гардонидани ислоҳоти милитсия заруранд, аз ҷумла, лоиҳаи Қонуни Ҷумҳурии Тоҷикистон «Дар бораи политсия», лоиҳаи Низомномаи «Шӯрои ҷамъиятӣ оид ба мусоидати ҷомеаи шаҳрвандӣ дар таъмини тартиботи ҷамъиятӣ дар назди Вазорати корҳои дохилии ҶТ», Кодекси ҳамкории мақомоти Вазорати корҳои дохилӣ ва ҷомеаи шаҳрвандиро мавриди муҳокима қарор доданд.  Аъзои Шўро аз вилояти Суғд баъди шиносоии бевосита ва муҳокимаи лоиҳаи ҳуҷҷатҳои мазкур изҳор доштанд, ки санадҳои номбурда барои ҷомеа, ҳамкории он бо милитсия таҳрир ва тафсири ҷиддиро тақозо дорад. Бинобар ин аъзои Шӯрои ҷамъиятӣ вазифадор  шуданд, ки лоиҳаҳоро бори дигар мавриди баррасӣ қарор дода, таклифҳои худро пешкаш намоянд.

Муртазоев С., Ахмедов Н.И.- аъзои Шӯрои ҷамъиятӣ оид ба мусоидати ҷомеаи шаҳрвандӣ ба ислоҳоти милитсия дар назди РВКД дар вилояти Суғд