Озмуни ровиёни ҷавон бахшида ба Рӯзи забони давлатӣ

Душанбе, 03.10.2015. (АМИТ «Ховар»).- » Ворисони Ҳамадонӣ»- таҳти ин унвон 2-уми октябри соли равон  Раёсати ҷавонон, варзиш ва сайёҳии шаҳри Душанбе ба муносибати таҷлили сазовори 700- солагии Мир Саид Алии Ҳамадонӣ ва Рӯзи забони давлатӣ озмуни ровиёни ҷавонро баргузор кард. 
Дар ҷараёни чорабинӣ равиёни ҷавони ташкилоту муассисаҳои таълимии  ноҳияҳои И.Сомонӣ, Фирдавсиву Сино ва Шоҳмансури пойтахт аз зиндагиномаву эҷодиёти пурғановати мутафаккири Шарқ Мир Саид Алии Ҳамадонӣ ёдоварӣ карда, ҳамчунин ба хотири арҷгузорӣ ба волоияти забони ноби тоҷикӣ аз ашъори шоирони классику муосири тоҷик маҳорати суханварии хешро пешкаши меҳмонону ҷавонон гардониданд. 
Ҳамчунин дар чорабинӣ дар доираи эълон гардидани соли 2015  ҳамчун Соли оила ва арҷгузорӣ ба фарҳанги либоспӯшии миллати тоҷик намоиши либосҳои тарроҳони чор ноҳияи шаҳрро пешкаш гардониданд. 
Дар чорабинӣ маҳорату истеъдоди суханварии ҷавонон баҳогузорӣ гардида, бо туҳфаҳои хотиравии кумитаи тадорукот қадрдонӣ шуданд. Ровиёни беҳтарин ва фаъолон барои ширкат дар даври ҷумҳуриявии озмун пешниҳод шуданд.