Панҷакент: нигаронӣ аз афзоиши ҳодисаҳои роҳу нақлиётӣ

Хуҷанд, 30.10.2015. (АМИТ «Ховар»).-Дар тӯли 15 рӯзи моҳи октябри соли ҷорӣ дар роҳҳои мошингарди шаҳри Панҷакент чор нафар фавтида, ду тан ҷароҳат бардошт, ки аз инҳо ду тан наврас аст. 
Тавре ки аз БДА-и Раёсати ВКД  ҶТ дар вилояти Суғд иттилоъ доданд, зиёд гардидани теъдоди ҳодисаҳои роҳу нақлиётӣ дар роҳҳои нақлиётгарди ҳудуди шаҳри Панҷакент масъулини Бозрасии давлатии автомобилии шаҳру вилоятро нигарон кардааст. 
Мутобиқ ба маълумоти манбаъ, танҳо дар давоми 9 моҳи соли 2015 дар роҳҳои нақлиётгарди ҳудуди шаҳри Панҷакент 20 садамаи наклиётӣ  рух додааст, ки дар натиҷа 13 нафар ба халокат расида, 14 каси дигар ҷароҳати гуногуни ҷисмонӣ бардоштанд.          
Инчунин дар давраи мазкур бо иштироки кўдакону наврасон 6 ҳодисаи роҳу нақлиётӣ  ба қайд гирифта шуданд, ки бар асари онҳо 3  кўдак ҳалок ва 3 нафари дигар маҷрўҳ  шуданд.