Парлумон ба Кодекси иҷрои ҷазои ҷиноятӣ тағйирот ворид намуд

  Душанбе, 09.10.2015.(АМИТ «Ховар»).- Минбаъд ба маҳбусоне, ки мубталои бемории сил мебошанду аз истифодаи дору ва риоя накардани реҷаи табобат дар муассисаҳои ислоҳӣ саркашӣ менамоянд, маҷбуран  дору ва ғизо дода мешавад. Дар ин росто палатаи поёнии Парлумони Тоҷикистон ба қисмҳои 1 ва 2 моддаи 24 ва ба қисми 5 моддаи 105-и   Кодекси иҷрои ҷазои  ҷиноятии Ҷумҳурии Тоҷикистон тағийру  иловаҳо ворид намуд.   Азизмуҳаммад Холмуҳаммадзода-раиси комиссияи назорати дастури Маҷлиси намояндагон зимни шарҳи масъалаи мазкур гуфт,ки  ҳадафи ворид намудани тағйиру иловаҳо ба Кодекси иҷрои ҷазои ҷиноятии Ҷумҳурии Тоҷикистон таъмини ҳимояи аҳолӣ аз бемории сил, пешгирии паҳншавии он, ки дар натиҷаи саркашии маҳкумшудагони гирифтори бемории сил аз истеъмоли дорувории зидди ин касалӣ ё ба пуррагӣ истеъмол накардани доруҳо, вайрон намудани реҷаи истеъмолӣ бармеоянд, мебошад.