Рабудани беш аз 14 ҳазор сомонӣ аз ҷониби ду ҷавон

Душанбе, 12.10.2015. (АМИТ «Ховар»).-Кормандони милитсия ду ҷавонмардро дастгир карданд, ки бо ҷурми дуздӣ айбдор  мешаванд.
Бино ба иттилои Шуъбаи Вазорати корҳои дохилӣ дар ноҳияи Қумсангир зани 37-солаи сокини ҳамин ноҳия муроҷиат намуда, гуфт, ки шаби 19-ум ба 20-уми сентябр шахсони номаълум ба тариқи пинҳонӣ вориди хонааш шуда, аз дохили ҷевон як планшет, як телефони мобилии тамғаи «Самсунг», 1000 доллари амрикоӣ, 6000 рубли ФР ва 1300 сомонӣ, ҷамъ ба маблағи умумии 14 ҳазору 180 сомониро дуздида, аз ҷойи ҳодиса ғайб задаанд. Дар натиҷаи гузаронидани чорабиниҳои фаврию ҷустуҷӯӣ кормандони милитсия 11-уми октябри соли ҷорӣ ду ҷавони 24 ва 25-соларо аз ноҳияи Қумсангир бо ҷурми даст доштан дар ин дуздӣ дастгир намуданд. 
Далели шайъӣ гирифта шуда, нисбат ба ҳодисаи мазкур парвандаи ҷиноятӣ оғоз гардидааст ва тафтиш идома дорад.