С. Шойгу: чор киштии Русия 26 ракетаро ба мавқеъҳои ДИ дар Сурия сар доданд

Душанбе,  07.10.2015. (АМИТ «Ховар»).- Чор киштӣ аз маҷмӯи киштиҳои ҳарбии флотилияи баҳрии Хазар субҳи имрӯз ба мавқеъҳои ҷангиёни «Давлати исломӣ» дар  Сурия бо 26 ракетаи болдор зарба заданд, ки ҳама ба ҳадаф расиданд ва  дар миёни аҳолии осоишта талафот ба қайд гирифта нашудааст.
Дар ин бора вазири дифои Федератсияи Русия Сергей Шойгу зимни мулоқот бо Президенти Русия Владимир Путин хабар дод.
«Барои нобуд кардани ҷангиён, ба ғайр аз неруҳои ҳавоӣ, субҳи имрӯз киштиҳои ҳарбии баҳри Хазар истифода шуда, чор киштии ракетадор 26 ракетаи болдори мавқеи баҳрии «Калибр»-ро ба 11 ҳадаф сар доданд»,-гуфт Шойгу ба шабакаи телевизионии «Русия 1».
Мавсуф илова кард, ки тибқи  иттилои расида, тамоми ҳадафҳо нобуд карда шуданд ва  шаҳрвандон зарар надидаанд. «Натиҷаи зарбаҳо самаранокии баланди ракетаҳоро дар масофаҳои калон- қариб дар 1,5 ҳазор километр тасдиқ карданд»,-таъкид кард вазир.