Сафарбаркунии муҳоҷирони меҳнатӣ ба Федератсияи Русия

Душанбе, 27.10.2015. (АМИТ «Ховар»). — Чанде пеш байни Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ва ҶДММ “Матрий групп” созишномаи ҳамкорӣ ба имзо расид.
Дар доираи ин ҳамкорӣ 15 муҳоҷири меҳнатӣ ба вилояти Ростови Федератсияи Русия, шаҳри Шахта сафарбар гардиданд.
Бояд гуфт, ки ширкатҳои болозикр дар асоси шартномаи меҳнатӣ муҳоҷиронро то Федератсияи Русия расонида, бо ҷои кор, маоши хуб, манзили зист ва шароити зарурӣ таъмин карда, фаъолияти меҳнатии онҳоро расмӣ мегардонанд.
Инчунин  бо ибтикори ҶДММ “Сомонэкспрестранс” аз шаҳри Конибодоми вилояти Суғд сафарбаркунии 18 шаҳрванд ба шаҳри Самараи Федератсияи Русия ба роҳ монда шуд. Аз инҳо нафарон 2 нафараш ноболиғ мебошанд, ки волидонашонро ҳамроҳӣ менамоянд.
Бино ба маълумоти роҳбари гурӯҳ Волидахон Раҳматова муҳлати сафари муҳоҷирони меҳнатӣ аз 1 сол пешбинӣ шудааст. Ҳамаи онҳо коргари қаторӣ мебошанд. Ёфтани ҷои кор ва истиқомат, ҳамзамон расмикунонии ҳуҷҷатҳо ба зиммаи худашон мебошад. 
Дар маросими гусели муҳоҷирони меҳнатӣ намояндагони Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд иштирок намуданд.