Санадҳои ҳуқуқвайрокунии маъмурӣ нисбат ба 289 шаҳрванди хориҷӣ

Душанбе, 13.09.2015. (АМИТ «Ховар») .-«Дар натиҷаи санҷишҳои нўҳмоҳаи соли равон  нисбат ба  289  шаҳрванди хориҷӣ  санадҳои ҳуқуқвайрокунии маъмурӣ тартиб дода шуд, ки ин нисбат ба ҳамин давраи соли гузашта 45 адад зиёд мебошад»,-гуфт сардори  шуъбаи пешгирии муҳоҷирати ғайриқонунии Хадамоти муҳоҷират Сафаралӣ  Файзалиев. 
 Дар давраи ҳисоботӣ  176 нафар (дар соли 2014-76 нафар) шаҳрванди хориҷӣ бо қарорҳои суд аз марзи Ҷумҳурии Тоҷикистон берун карда шуданд, ки ин нисбат ба соли гузашта 100 нафар зиёд мебошад.
Ҳангоми гузаронидани амалиёт дар ҳудуди Ҷумҳурии Тоҷикистон 10041 шаҳрванди хориҷӣ, аз ҷумла, 6152 шаҳрванди хориҷӣ дар ҷойи зисташон, 103 объектҳои сохтмонӣ, 77  объектҳои саноатӣ, 162  меҳмонхона, 45 хобгоҳ, 139 нуқтаҳои савдо ва 179 ширкатҳо, ки дар онҳо шаҳрвандони хориҷӣ фаъолият менамоянд, санҷида шуданд.  
 Бояд гуфт, ки амалиёти Нелегал-2015 дар вилояти Хатлон ва Суғд низ гузаронида шуд.
 Бино ба иттилои сухангӯи Хадмоти муҳоҷират А.Қодирӣ, дар натиҷа барои вайрон кардани қоидаҳои будубош шаҳрвандони хориҷӣ  дар марҳилаи аввали амалиёти махсус Нелегал-2015 нисбат ба  195  шаҳрванди хориҷӣ ва қабулкунандагони шаҳрвандони хориҷи  дар Ҷумҳурии Тоҷикистон протоколҳои маъмурӣ тартиб дода шуда, 48 нафари онҳо барои дағалона вайрон намудани қоидаҳои будубош бо қарори суд аз қаламрави ҷумҳурӣ берун карда шуданд.