Шаҳноза соҳиби «Тоҷи тиллоӣ»-и озмуни «Соҳибҷамол-2015» гардид

Душанбе, 05.10.2015 (АМИТ «Ховар»).-Зебосанами панҷакентӣ Шаҳноза Азамқулова «Тоҷи тиллоӣ»-и барнома-озмуни «Соҳибҷамол-2015»-ро, ки дирӯз, 4-уми октябри соли равон дар Филармонияи давлатии Тоҷикистон ба номи А. Ҷӯраев барпо шуд, соҳиб гашт.  
Шаҳноза, ки  21 сол дорад ва донандаи панҷ забон мебошад, дар ҳамаи даври озмун ғолиб омада, Шоҳҷоизаи озмуни мазкурро ба даст овард. Ҳайати ҳакамони озмун ба Нилуфар Ҷаъфарова, ки маҳорати хуб дошта, донандаи 4 забон аст, мақоми аввалро  доданд.  
Баҳор Тошева аз шаҳри Турсунзода дар озмун ҷоизаи «Таваҷҷуҳи бинанда»-ро соҳиб гашт. Ӯ донандаи 3 забон буда, бо ҳусну ҷамоли хеш ва маҳорати суханварии худ на танҳо таваҷҷуҳи бинандагон, балки аъзои ҳакамонро тасхир карда, соҳиби ин ҷоиза гардид. 
Бино ба иттилои Таҳмина Худойқулова, ровии барнома, озмун дар  3 давр тӯли  9 моҳ дар шабакаи фарҳангӣ-фароғатии Муассисаи давлатии телевизиони «Сафина» гузаронида шуд. 
Ба гуфтаи мавсуф, барнома бахшида ба «Соли оила» гузаронида шуда, он аз панҷ бахш, намоиши либос дар ду шакл- миллӣ ва аврупоӣ, санҷиши маҳорати пазандагӣ, маҳорати забондонӣ ва расонидани ёрии аввалин иборат буд. 
Дар даври аввали озмун  41 довталаб,  даври дуюм 21 нафар ва дар даври сеюм ва ниҳоӣ 10 соҳибҷамол иштирок намуда, маҳорати хешро санҷиданд. 
Даври ниҳоии озмун дар ду бахш- санъати суханварӣ ва намоиши либос  баргузор гардид.