Соҳибистиқлолӣ аз ҷавонон масъулияти баланд тақозо дорад

Душанбе, 07.10.2015 (АМИТ «Ховар»).- Чанде пеш масъулини Кумитаи ҷавонон, варзиш ва сайёҳӣ бо ҷавонон ва донишҷӯёни фаъоли шаҳри Ваҳдат мулоқот карданд.
Бино ба иттилои Кумитаи мазкур, дар мулоқот муовини раиси Кумитаи ҷавонон, варзиш ва сайёҳӣ Ҳабибулло Амирбекзода, намояндагони бахши занон ва оила, оид ба дин, танзими анъана ва ҷашну маросими миллӣ, директори мактаби варзишии кӯдакону наврасон ва дигар намояндагони мақомоти иҷроияи шаҳр иштирок намуданд.
Ҳ. Амирбекзода аз дастовардҳои ҷавонону варзишгарон дар даврони соҳибистиқлолӣ ёдовар шуда, зикр дошт, ки арзиш ва муҳимияти Истиқлолияти давлатӣ рӯз ба рӯз бештар эҳсос гардида, он аз ҳамаи ҷавонон масъулияти зиёдро талаб менамояд. 
Ҳамчунин зимни мулоқот масъулин вобаста ба муҳимияти амнияту субот ва Ваҳдати миллӣ дар кишвар ибрози андеша карда, масоили гаравидани ҷавонон ба ҳизбу ҳаракатҳои иртиҷоӣ, пешгирӣ намудани паҳншавии афкори экстремистиро дар миёни ҷавонон баррасӣ карда, онҳоро ба худшиносию ватандӯстӣ даъват карданд. 
Дар чорабинӣ ба Бузургмеҳр Мирзоев, ки дар дастгир намудани ҷинояткорон дар дараи Ромит ба мақомоти қудратӣ кумак расондааст, аз ҷониби Кумитаи ҷавонон, варзиш ва сайёҳӣ Ифтихорнома тақдим шуд.