Суғд: иҷрои нақша беш аз 43% -и дурнамои чиниши пахта

Суғд, 07.10.2015. (АМИТ “Ховар”).-То  5 октябри соли ҷорӣ дар ҳафт навоҳии пахтакори вилояти Суғд  49 ҳазору 803 тонна пахта ҷамъоварӣ шудааст, ки ба 43,27%-и дурнамо баробар аст.
Тавре ки ба АМИТ Ховар  Абдуазиз Маҳмудов, сармутахассиси Сарраёсати кишоварзии вилояти Суғд хабар дод,  ҳамарӯза дар вилоят беш аз 1700-1800 тонна пахта чида мешавад. Пешсафони маъракаи чиниши пахта дар вилоят кишоварзони ноҳияҳои Конибодом (иҷро-56,52%), Ҷ. Расулов (51,32%) ва Спитамен ( 47,85%)  мебошанд. 
 Дар вилоят алъон 35 корхонаи коркарди пахта амал мекунад. Инчунин ба ҳар як чинакчӣ барои ҳар як кило пахтаи чидашуда аз ҷониби хоҷагиҳо аз 40 то 50 дирам пардохт мешавад.
Бояд гуфт, ки имсол дар вилоят дар майдони 42 ҳазору 953 гектар пахта кишт гардида, қарор аст то охири соли ҷорӣ 115,1  ҳазор  тонна «тиллои сафед» ҷамъоварӣ шавад.