Вусъати корҳои сохтмонӣ дар бинои нави Академияи ВКД

Душанбе, 22.10.2015 (АМИТ «Ховар»).-Имрӯзҳо корҳои сохтмонӣ дар бинои нави таълимии Академияи Вазорати корҳои дохилӣ бо суръат идома доранд. Сохтмончиён бо истифода аз имкониятҳои мавҷуда тамоми кӯшишу ғайрати худро ба он равона сохтаанд, ки бинои мазкурро сари вақт ва бо сифати баланди ба меъёрҳои байналмиллалӣ ҷавобгӯ ба истифода диҳанд. 
Сохтмони бино бояд то моҳи сентябри соли 2016 пурра ба итмом расида, мавриди истифода қарор гирад. То имрӯз аллакай таҳкурсӣ ва сутуни деворҳои ин бинои нӯҳошёна бунёд гардида, хиштгузорӣ ва корҳои бетонию симбандӣ идома доранд.
Мувофиқи тарҳи пешниҳоднамудаи Кумитаи меъморӣ ва сохтмони назди Ҳукумати Ҷумҳурии Тоҷикистон бино дорои се блок (А,Б,В) буда, дар таҳхонаи он китобхона бо назардошти 150 ҷойи нишаст дар назар дошта шудааст.
Дар ошёнаи якум китобхонаи электронӣ ва ошхона барои 150 нафар, синфхонаҳо, ҳуҷраҳои корӣ, бунгоҳи тиббӣ ҷойгир хоҳанд буд. Дар ошёнаи дуюм маҷлисгоҳ барои баргузории чорабиниҳои муҳим тарҳрезӣ шудааст.
Дар баробари сохтмони академияи мазкур, хобгоҳ барои 700  шунаванда ва Маҷмааи варзишӣ бо тамоми шароити лозимӣ низ пешбинӣ гардидааст.