Забон — рукни асосии давлат ва поягузори миллат

Душанбе, 02.10.2015. (АМИТ «Ховар», Лайло Тоирӣ). — Имрӯз, 2 октябр дар  Вазорати меҳнат, муҳоҷират ва шуғли аҳолии Ҷумҳурии Тоҷикистон бо иштироки муовини раиси Кумитаи забон ва истилоҳоти назди Ҳукумати Ҷумҳурии Тоҷикистон — Матробиён Саодатшо, сардори шуъбаи танзими истилоҳот — Нуқра Аҳмадзода, сармутахассиси шуъбаи ташкилию ҳуқуқӣ — Ғулом Сангов ва шоир-адиби тоҷик Назри Яздонӣ чорабинии тантанавӣ бахшида ба Рўзи забони давлатӣ баргузор гардид.
Дар чорабинӣ муовини якуми вазири меҳнат, муҳоҷират ва шуғли аҳолии Ҷумҳурии Тоҷикистон Эмин Сангинзода зикр кард, ки Иди забон   имрўзҳо дар тамоми қаламрави кишвар чун рамзи ваҳдату ягонагӣ, ифтихор аз давлату ватандорӣ, ботантана ҷашн гирифта мешавад. Аз тарафи дигар ин рўзи таърихӣ моро водор месозад, ки  мисли дигар суннатҳои бостонии миллӣ ба он арҷ гузорем, зеро имрўз мо соҳиби забони зебо ва шевотарини дунё ҳастем, ки барҷастатарин олимони асримиёнагӣ, чун Абурайҳони Берунӣ, Ибни Сино, Закариёи Розӣ, Носири Хусрав ва ҳамсафону пайравони онҳо осори илмии хешро ба ин забон навишта, ба тамаддуни ҷаҳонӣ пешниҳод кардаанд.
Тавре ки аз Вазорати меҳнат, муҳоҷират ва шуғли аҳолӣ хабар доданд, меҳмонони чорабинӣ дар атрофи забони давлатӣ ҳамчун поягузори давлату миллат маърўза карданд.