35 ҷавони суғдӣ соҳиби шаҳодатномаи мактаби кадрҳои захиравӣ гардиданд

Душанбе. 4.11.2015. (АМИТ «Ховар»).- Дирӯз дар Мақомоти иҷроияи ҳокимияти давлатии вилояти Суғд ба 35 ҷавони вилоят шаҳодатномаи мактаби кадрҳои захиравӣ супорида шуд.
Тибқи иттилои Хадамоти матбуоти раиси вилояти Суғд, роҳбари дастгоҳи раиси вилоят Ғафурҷон Зоиров зимни тақдими дипломҳо зикр кард, ки ин таваҷҷуҳ нишона аз сулҳу субот дар кишвар мебошад ва 35 мутахассиси ҷавоне, ки дар соҳаҳои гуногуни шаҳру ноҳияҳои вилоят фаъолият доранд, мактаби захираи кадрҳои назди мақомоти иҷроияи ҳокимияти давлатии вилояти Суғдро хатм кардаанд.
15 сол аст, ки дар назди мақомоти иҷроияи ҳокимияти давлатии вилояти Суғд мактаби кадрҳои захиравӣ таъсис дода шуда, дар давоми ин солҳо шумораи зиёди нафарон мактаби мазкурро хатм карда, имрӯз дар вазифаҳои гуногуни давлатӣ фаъолият доранд.