А. Иброҳим: «Сохтмони роҳҳо хуб, аммо корҳои барқтаъминкунии корхонаҳои саноатӣ ҷиддиятро талаб доранд»

Душанбе, 10.11.2015. (АМИТ «Ховар).-6 ноябри соли ҷорӣ муовини сарвазир Азим Иброҳим вобаста ба азназаргузаронии сифати корҳои анҷомёфта дар сохтмони роҳи мошингарди «Данғара-Кангурт» ва раванди иҷрои корҳои сохтмониву васлкунии корхонаҳои саноатӣ ба ноҳияи Данғара сафари корӣ анҷом дод. 
Баъди азназаргузаронии маҷмўи корҳои анҷомёфтаи сохтмони роҳи мошингарди «Данғара-Кангурт», ки аз ҷониби ширкати чинии «Чайна-Роуд» иҷро гардидаанд, муовини сарвазир таъмини сифати корҳои сохтмониро асосан хуб арзёбӣ намуда, барои ислоҳ кардани баъзе  камбудиҳои мавҷуда дастурҳо дод. 
Сохтмони зеристгоҳи барқии «Корез», ки корхонаи «Ҷунтай-Данғарасин силу текстил»-ро бояд бо барқ таъмин кунад,  мебоист то 13 ноябр ба фаъолият оғоз менамуд, аммо то ба ҳол корҳои сохтмониву барқарорсозӣ идома доранд. Муовини сарвазир ба паймонкор ҶДММ «Тоҷикгидромонтаж» ва шахсони масъул супориши қатъӣ дод, ки вобаста ба иҷрои корҳои боқимонда, нақшаи иҷрои онро омода сохта, дар давоми як моҳ тамоми корҳои боқимондаро ба анҷом расонанд. 
Корҳои сохтмонӣ дар зеристгоҳи барқии нақшавии Минтақаи озоди иқтисодии (МОИ)  «Данғара»  ба таври зарурӣ ба роҳ монда нашудаанд. Муовини сарвазир таъкид намуд, ки дар соли оянда талабот ба неруи барқ вобаста ба иншооти бунёдшаванда дар ин минтақа зиёд мегардад, бинобар ин зарур аст, ки масъулини МОИ «Данғара» корҳои сохтмониро тибқи нақша бо шарикони паймонкор дар муҳлатҳои пешбинишуда ба анҷом расонанд. 
Мавриди зикр аст, ки ҳоло дар ҳудуди МОИ «Данғара» 34 корхона ба қайд гирифта шуда, 5 корхонаи он ба фаъолият оғоз намудааст ва дар давоми 10 моҳи соли равон ба маблағи 1,6 млн. сомонӣ маҳсулот истеҳсол кардаанд. Дар ин минтақаи озоди иқтисодӣ ҳоло зиёда аз 560 шаҳрванд бо кори доимӣ таъмин мебошанд.